သွေးနဲ့ရင်းပြီး အနုပညာကို ချစ်မြတ်နိုးတဲ့အတွက် တက်တူးတွေထိုးခဲ့တာဖြစ်သလို ဆက်ထိုးဖို့လည်း ရှိပါတယ်လို့ဆိုတဲ့ စည်ဖြိုး

ပန်းချီကို စိတ်ဝင်စားတဲ့ စည်ဖြိုးဟာ ကားချပ်ပေါ်မှာ တင်ထားတဲ့ ပန်းချီကားတွေဟာ ရာသီဥတု ဒဏ်ကြောင့်သော်လည်းကောင်း၊ ဘေးအန္တရယ်ကြောင့်သော်လည်းကောင်း ယိုယွင်းပျက်စီးမှာကို စိုးရိမ်တဲ့တွက် ခန္ဓာကိုယ်ပေါ်မှာ သူ့ဘ၀ရဲ့အရေးပါတဲ့ အစိတ်အပိုင်းတချို့ကို သွေးနဲ့ရင်းပြီး ထိုးထားတဲ့အကြောင်း ဖွင့်ဟလာပါတယ်။ သူမြတ်နိုးတဲ့ တက်တူးအကြောင်းကို “တက်တူးတွေက တစ်ကိုယ်လုံးမှာဆို အများကြီးပဲ။ လွန်ခဲ့တဲ့ ၃ နှစ်လောက်ကတည်းကစထိုးဖြစ်တာ။ တက်တူးစဖြစ်ပုံက ကျွန်တော်က ပန်းချီတွေကိုချစ်တာ၊ အဲ့ဒီကနေ အတွေးအခေါ်ပေးတဲ့ပန်းချီတွေကို ကြိုက်လာတယ်။ ၀ယ်ပြီးသိမ်းထားချင်စိတ်တွေ ပေါက်လာတယ်။ ဒါပေမဲ့ ပန်းချီကား တစ်ကားတစ်ကားကလဲ ဈေးအရမ်းကြီးတယ်။ တကယ်လို့ ကိုယ်နှစ်သက်တဲ့ ပန်းချီကားတစ်ခုကို ၀ယ်ပြီး နံရံမှာချိတ်ထားမယ်ဆို ရာသီဥတုဒဏ်ကြောင့်သော်လည်းကောင်း၊ အချိန်ကာလ ရွေ့လျားမှုကြောင့်သော်လည်းကောင်း၊ သဘာဝ ဘေးအန္တရယ်ကြောင့်သော်လည်းကောင်း ဆုံးရှုံးသွားနိုင်တယ်။ အဲ့ဒါကြောင့် အရမ်းတန်ဖိုးထားတဲ့ စာစုတွေပဲဖြစ်ဖြစ် ၊ ကိုယ်အရမ်းကြိုက်တဲ့ အရုပ်ပဲဖြစ်ဖြစ်၊ ကိုယ့်ရဲ့သမိုင်းကို ထိုးထားဖြစ်ပါတယ်။

ဝါစိမ်းနီကမ္ဘာသိမ်းမည်တွက် ဘယ်ဖက် ပခုံးမှာ အမှတ်တရအနေနဲ့ထိုးထားတယ်။ ပထမဦးဆုံး ဇာတ်လမ်းတွဲဆိုတော့လေ။ အဲ့ဇာတ်လမ်းတွဲ ပြီးတဲ့နေ့မှာ ဦးညီထွန်းလွင်ကို ကန်တော့တဲ့နေ့မှာ သွားထိုးထားဖြစ်တယ်။ ကိုယ်မြတ်နိုးတဲ့ ဘယ်အရာမဆို အဆုံးရှုံးမခံနိုင်လို့ခန္ဓာကိုယ်ပေါ်မှာ မှတ်ကျောက်တင်ထားတာပေါ့။ သွေးနဲ့ရင်းပြီး အနုပညာကို ချစ်မြတ်နိုးတယ်ဆိုတဲ့ အဓိပ္ပါယ်လဲရောက်တယ်။ အဖေ့မွေးနေ့၊ အမေ့မွေးနေ့ လက်မောင်းသားအောက်ဖက်မှာ ထိုးထားတယ်။ ကျောကုန်းက ဆာမူရိုင်းရပ်နေတဲ့ပုံ၊ ၀ါးတောရယ်၊ စမ်းချောင်းရယ်၊ ခြေထောက်မှာက သရဲတွေရောအများကြီးပဲ။ ကိုယ်ကြိုက်နှစ်သက်တဲ့ အနုပညာအရာတစ်ခုကို စိတ်ချရတဲ့ ကိုယ့်အရေပြားပေါ်မှာ တင်ထားလို့ရှိရင် သေရင်တောင် ကိုယ့်နောက်ပါသွားမယ်ပေါ့။ ချွတ်ပြီးယူလို့လဲမရဘူးလေ။ အဲ့ဒါကြောင့်ထိုးထားဖြစ်တယ်။ အိမ်က မိဘတွေကတော့ ဘာသာတရားလဲကိုင်းရှိုင်းပြီးတော့မြန်မာလူမျိုးလဲပီသတယ်။ ဒါပေမဲ့ ပုံသေ နည်းတွေတော့မရှိဘူး။ ပုံသေနည်းဆိုတာ တက်တူးထိုးရင် ရိုက်မယ်ဆိုတာမျိုး မရှိဘူး။ ပင်တိုင်ထိုးဖြစ်တာကတော့ တက်တူးလပိုင်ဆီမှာ အမြဲထိုးဖြစ်တယ်။ ကျွန်တော့် သမိုင်းမပြီးသေးတဲ့တွက် တက်တူးတွေကတော့ ဆက်ထိုးဖို့ရှိပါသေးတယ်”လို့ သူက ပြောပြခဲ့ပါတယ်။

လက်ရှိအနုပညာလှုပ်ရှားမှုနဲ့ စည်ဖြိုးဟာ MRTV 4 အတွက် တစ်မိုးအောက် အစီအစဉ် ဖြစ်ပြီး နောက်ဆုံး ရိုက်ထားတဲ့ဇာတ်ကားကတော့ သစ္စာနှင်းဆီနဲ့ ပေါက်ကရနေ့စွဲများ ဆိုတဲ့ကားလေးကို ခင်ဝင့်ဝါနဲ့အတူ ရိုက်ကူးထားတယ်လို့ သိရပါတယ်။