ရွာများကို စည်းရိုးခတ်မယ်လို့ တရုတ် ကုမ္ပဏီပြော

စံပယ်တောင်-ကြေးစင်တောင်စီမံကိန်း ၀န်းကျင်က ရွာတွေမှာ စည်းရိုးခတ်မယ်လို့ ကျေးရွာ အုပ်ချုပ်ရေးမှူးတွေကို မြန်မာ-ယန်စီကြေးနီကုမ္ပဏီက အကြောင်းကြား ထားတယ်လို့ ဒေသခံတွေက ပြောပါတယ်။

လျော်ကြေးပေးဖို့တောင်းဆိုထားတဲ့မြေတွေမှာ စည်းရိုးခတ်မယ့် အကြောင်း ပြောတာ ဖြစ်တယ်လို့ ဒေသခံတဦးက ပြောပါတယ်။

"စံပယ်တောင်၊ ကြေးစင်တောင်ကလေ၊ ခြံစည်းရိုး ခတ်မယ်ဆိုပြီးတော့ ကျေးရွာအုပ်ချုပ်ရေးမှူးတွေဆီကို ၂၈ ရက်နေ့မှာ သွပ်ဆူးကြိုးခတ်မယ်လို့ ကုမ္ပဏီက စာပို့တယ်လို့ သိရတယ်၊ ယန်စီကုမ္ပဏီကနေပို့တာ၊ သွပ်ဆူးကြိုးခတ်မယ်ဆိုတဲ့ ဧရိယာက တကယ်တော့ မြေလျော်ကြေးပေးထားတဲ့ နေရာတွေမဟုတ်ဘူး၊ အဲ့ဒီ နေရာနဲ့ပတ်သက်လို့ ကျနော်တို့ မြေသိရဖို့အတွက် တောင်းဆိုထားတဲ့ နေရာတွေဖြစ်တယ်"

ဒီမြေတွေကို ကနေဒါ နိုင်ငံ အခြေစိုက် Ivanhoe ကုမ္ပဏီလက်ထက်ကတည်းက လျော်ကြေးမပေးဘဲ သိမ်းယူထားတာဖြစ်ပြီး နစ်နာကြေးပေးဖို့ ရွာသားတွေက တောင်းခံထားတာလို့လည်း ပြောပါတယ်။

"စစ်ကိုင်းတိုင်းဝန်ကြီးချုပ် ဦးသာအေးကနေပြီးတော့ ဒီဖော်ဆောင်ရေးကော်မတီ ဒုတိယဥက္ကဌ လည်းဖြစ်တယ်လေ ဦးသာအေးက၊ သူကနေပြီးတော့ မြေယာလျော်ကြေးပေးမယ်လို့ ၂၀၁၃၊ ၁၂ လပိုင်း ၅ ရက်နေ့က ပြောခဲ့တယ်၊ ဦးပိုင်ကနေ ဒီကြေးနီစီမံကိန်းကဟာ သူတို့ကို မြေလျော်ကြေး ပေးစရာမလိုပါဘူး၊ နိုင်ငံတော်မှာပဲ တာဝန်ရှိပါတယ်ဆိုပြီးတော့ ကျနော်တို့ဆီကို စာပို့တာ၊ အခု အဲ့ဒီနေရာတွေကို သူတို့သွပ်ဆူးကြိုးခတ်မယ်ဆိုတော့ ကျနော်တို့အနေနဲ့ ဘယ်လိုမှ လက်ခံလို့ မဖြစ်ဘူးဗျ၊ ကျနော်တို့မြေယာတွေဟာ အရင် နိုင်ငံတော်နဲ့ အဲ့လိုမျိုးလုပ်ခဲ့တဲ့ စီမံကိန်းလေ၊ အဲ့ဒီအတွက်ကို ကျနော်တို့က ဆုံးရှုံးနစ်နာကြေးကို ကျနော်တို့က တောင်းဆိုနေတာလေ၊ ကြေးနီစီမံကိန်း မြေယာလျော်ကြေးပေးသလိုမျိုး ကျနော်တို့ကိုလည်းပေးဖို့ သိမ်းစဉ်ကာလတုန်းကလည်း မြေလျော်ကြေးဆိုတာကိုလည်း ပေးခဲ့တာမရှိဘူး၊ အရင်တုန်းက လယ်ယာမြေကို နိုင်ငံပိုင်ဆိုပြီးတော့ သိမ်းတာလေ၊ ကော်မရှင်ဥက္ကဌတွေ၊ ဒေါ်အောင်ဆန်းစုကြည် ကိုယ်တိုင်ကလည်း ကြေးနီစီမံကိန်းမှန်ရင် မြေယာလျော်ကြေးပေးရမယ်လို့ ပြောတယ်"

လက်ပံတောင်းတောင်ကြေးနီစီမံကိန်း အစီရင်ခံစာ အကောင်အထည်ဖော်ရေး ကော်မတီ အတွင်းရေးမှူးကို မြေယာနစ်နာကြေးကိစ္စဆောင်ရွက်ဖို့တာဝန်လွှဲအပ်ထားပေမဲ့ အခုချိန်ထိ တစုံတရာ ဆောင်ရွက်ပေးတာ မရှိဘူးလို့လည်း ပြောကြားပါတယ်။

RFA Burmese