ပရိသတ်ချစ်တဲ့ အဆိုတော်တွေ အများကြီးရှိလို့ Vote စနစ်ကို တိတိကျကျ သိစေချင်ကြောင်း ပိုပို ပြော

အောင်မြင်စွာ ကျင်းပပြီးစီး သွားခဲ့တဲ့ မိုးရာသီ မြန်မာဂီတ ဆုပေးပွဲကို တေးသံ ရှင် ပိုပို က နယ်ရှိုးဆိုနေတဲ့အတွက် တက်ရောက်နိုင်ခဲ့ခြင်း မရှိပေမယ့် အဝေး ကနေ အားပေးနေခဲ့ကြောင်း၊ ကိုယ်တိုင်လည်း Vote ပေးခဲ့ကြောင်း ဆိုပါတယ်။ အဆိုပါ ဆုပေးပွဲမှာ ကျင့်သုံးခဲ့တဲ့ အွန်လိုင်း Vote စနစ်နဲ့ ပတ်သက်ပြီး ပရိသတ် သိပ်မသိသေးကြောင်းကို

“အွန်လိုင်း Vote စနစ်က ကိုယ်ကြိုက်မှ Vote ပေးမှာပေါ့။ တစ်ခုတော့ရှိတယ်။ Vote လုပ်မယ်ဆိုရင် စမလုပ်ခင် ဘယ်နေ့ကစပြီး Vote လုပ်လို့ရမယ်ဆိုတာ လေးကို ကြိုတင်ပြောထားပေးရင်တော့ ပိုကောင်းတာပေါ့။ ပိုပိုပြောချင်တာက တခြားသူတွေကို တိုက်ခိုက်ချင်တာ မဟုတ်ဘူး။ ဒါပေမဲ့ တချို့သော အနုပညာ ရှင်တွေမှာလည်း ပရိသတ်ချစ်တဲ့ အဆိုတော်တွေ အများကြီးရှိပါတယ်။ ဒါပေမဲ့ Vote လုပ်ဖို့ ပရိသတ် မသိကြတာပါ” လုိ့ ပိုပိုကဆိုပါတယ်။ ‘ချစ်ဖူးခဲ့သမျှ’ တစ်ကိုယ်တော် အခွေထွက်အပြီး ဒုတိယ တစ်ကိုယ်တော် အခွေအတွက် ပြင်ဆင်နေတဲ့ ပိုပို က ကြားထဲမှာ ပရိသတ်နဲ့ အဆက်မပြတ်ရအောင် အွန်လိုင်း မှာ သီချင်းသစ်တွေ တင်ထားကြောင်းကို

“ပိုပို ဆိုလို့ရှိရင် Myanmar Music Store မှာ ဇေရဲနဲ့ ‘အဆိပ်တိုက်ပွဲ’ ဆိုတဲ့ သီချင်းလေးကို ပထမဆုံး သူ့ရဲ့ Digital Album အတွက်ရောင်းတယ်။ ပြီးတော့ ကိုစိုးကြီးနဲ့ ပိုပို ဖီးချားရင်း ဆိုပေးထားတဲ့ ‘ငါမုန်းမရ’ ဆိုတဲ့သီချင်း၊ သူလည်း Digital Single Album ထွက်တယ်။ အခု နောက်ဆုံးကျတော့ ကိုလင်းနစ်နဲ့ ‘ရိုးသားမိတဲ့အမှား’ အဲဒီ သီချင်းကျတော့ Free Download ပေးထားတယ်” လို့ပြောတဲ့ ပိုပိုက တစ်လနီးပါးခန့် နယ်ခရီးတွေ ဆက်တိုက်ထွက်ခဲ့ရစဉ် အမှတ်တရ တွေကိုလည်း အခုလိုပြောပါတယ်။

“နယ်သွားတဲ့ အမှတ်တရ ဆိုရင်တော့ မြစ်ကြီးနားကနေ စိုင်းတောင်ကို သွားရတာ အမှတ်တရဖြစ်တယ်။ တော်တော်ကို လမ်းတွေကြမ်းတာမှ ဆင်ကြီး တွေနဲ့တောင် ဆွဲရတယ်။ ဟိုမှာကလည်း မိုးတွေကရွာ၊ လမ်းကကြမ်းနဲ့ တော်တော် အမှတ်တရဖြစ်ပါတယ်” လို့ ပြောတဲ့ ပိုပို က ဆက်လက်ပြီးလည်း နေပြည်တော်၊ မန္တလေးမှာ ရှိုးတွေ ဆက်တိုက်ဆိုဖို့ ရှိကြောင်းလည်း ဆိုပါတယ်။