ကမ္ဘာ့ အပါးလွှာဆုံး Dell Venue 8 7000 Series တက်ဘလက်အား မိတ်ဆက်ပြသ

ပြီးခဲ့တဲ့ ရက်ပိုင်းအတွင်း Apple၊ Apple၊ Apple ဆိုပြီး လူအများ အာရုံထွေပြား နေခဲ့တဲ့အချိန်မှာ ယခင်ကလောက် နာမည်ကျော်ကြားခြင်း မရှိတော့တဲ့ အမေရိကန် ကုမ္ပဏီကြီး နောက်တစ်ခုဖြစ်တဲ့ Dell က ကမ္ဘာ့အပါးလွှာဆုံးလို့ ဆိုရမယ့် တက်ဘလက် တစ်လုံးကို ထုတ်ဖော်ပြသ သွားခဲ့ပါတယ်။

Dell နဲ့ Intel တို့ ပူးပေါင်းဖန်တီးထားတဲ့ Dell Venue 8 7000 စီးရီးစ်လို့ အမည်ပေးထားတဲ့ ဒီတက်ဘလက်ကို Dell နဲ့ Intel တို့ရဲ့ CEO များဖြစ်တဲ့ Michael Dell နဲ့ Brian Krzanich တို့က ယမန်နေ့မှာ မိတ်ဆက်ပြသ သွားခဲ့ခြင်း ဖြစ်ပါတယ်။

iPad တွေ Galaxy Tab တွေ အပါအဝင် လက်ရှိ ဈေးကွက်ထဲက အကောင်းဆုံးဆိုတဲ့ တက်ဘလက်တွေတောင် ကင်မရာပိုင်းဆိုင်ရာမှာ အားနည်းမှုတွေ တပုံတပင် ရှိနေစဲပါပဲ။ စမတ်ဖုန်းတွေရဲ့ ကင်မရာတွေကို ယှဉ်ပြိုင်နိုင်စွမ်း မရှိပါဘူး။ ဒီပြဿနာကို Venue 8 တက်ဘလက်က ဖြေရှင်းပေးဖို့ ကြိုးစားထားပါတယ်။ ဒါတင်မကသေးပါဘူး။ Venue 8 ရဲ့ နောက်ဖက်မှာ ကင်မရာ ၃ လုံး တပ်ဆင်ပေးထားလို့ စစ်မှန်တဲ့ ၃ ဖက်မြင် (3D) ပုံရိပ်များကို ရိုက်ကူးနိုင်မှာ ဖြစ်ပါတယ်။

ဒီ တက်ဘလက်ဟာ အထူ ၆ မီလီမီတာ (၀.၂၄ လက်မ) ရှိပြီး Sony ရဲ့ Xperia Z3 ထက်တောင် ၀.၄ မီလီမီတာ ပိုမိုပါးလွှာပါတယ်။ မျက်နှာပြင်အရွယ် ၈.၄ လက်ဖြစ်ပြီး ပုံထွက်နှုန်းကတော့ 2K 2560 x 1600 pixels ရှိပါတယ်။ ဒီ OLED မျက်နှာပြင်ကိုတော့ Samsung က ထုတ်လုပ်ပေးထားတာ ဖြစ်ပါတယ်။ Dell က ဒီမျက်နှာပြင်ကို အနားကွပ် မပါသလောက် သေးငယ်တဲ့ “Infinity Display” လို့ ရည်ညွှန်းခေါ်ဆို ထားပါတယ်။ ပြောသလောက်တော့ မဟုတ်ပါဘူး။

Venue 8 ဟာ အလွန်ပေ့ါပါးပြီး ကိုင်တွယ်အသုံးပြုရတာ အဆင်ပြေလွယ်ကူတဲ့ တက်ဘလက်ဖြစ်ပါတယ်။ ပုံစံဒီဇိုင်း အပိုင်းမှာတော့ ထက်ဝက်ပြတ်နေတဲ့ အကြီးစား HTC One နဲ့ ဆင်တူနေသယောင် ရှိပါတယ်။ စပီကာယူနစ်နဲ့ Intel ရဲ့ RealSense ကင်မရာ ယူနစ်တွေကို တက်ဘလက်ရဲ့ ဘယ်ဖက်ခြမ်းမှာ တပ်ဆင်ပေးထားပါတယ်။ နောက်ဖက်က ပင်မကင်မရာက 8 MP ပုံထွက်နှုန်း ရှိပြီး ရှေ့ဖက် ကင်မရာအပါအဝင် စုစုပေါင်း ကင်မရာ ၄ လုံး တပ်ဆင်ပေးထားပါတယ်။

RealSense နည်းပညာဟာ 3D ပုံများ ရိုက်ကူးခြင်း၊ ရိုက်ကူးပြီးသာ ဓာတ်ပုံများကို Focus ပြန်လည်ချိန်ဆခြင်း၊ ဓာတ်ပုံပေါ်ရှိ နေရာ ၂ ခု၏ အကွာအဝေးအား တိုင်းတာပေးခြင်း စသည်ဖြင့် ထူးခြားတဲ့ လုပ်ဆောင်ချက်များကို ဖန်တီးပေးမှာ ဖြစ်ပါတယ်။

Venue 8 မှာ 1.33 မှ 2.33 GHz အကြား အမြန်နှုန်းရှိတဲ့ Intel Z3500 Quad-core CPU ကို ထည့်သွင်းပေးထားတယ် ဆိုတာကလွဲလို့ အခြား အသေးစိတ် အချက်အလက်များကို ထုတ်ဖော်ပြကြားခြင်း မရှိသေးပါဘူး။

ဒီတက်ဘက်လက်မှာ ထပ်ဆောင်း ဝယ်ယူတပ်ဆင်ရတဲ့ adapter ကို အသုံးပြုပြီး Keyboard နဲ့ Mouse တို့ကိုလည်း ချိတ်ဆက်နိုင်ပါသေးတယ်။ Venue 8 ဟာ လက်ရှိအချိန်မှာ နောက်ဆုံးအဆင့် Prototype အဖြစ်သာ ရှိနေသေးတာမို့ ဈေးကွက်ထဲ ရောက်ရှိလာဖို့ လအနည်းငယ် ကြာမြင့်ဖွယ် ရှိပါတယ်။

MCG Staff