ပက်ထရစ်ရှာဆိုတဲ့ နာမည်ကို အသုံးချပြီး လူစိတ်ဝင်စားအောင် လုပ်ဖို့အတွက် ဒီပြိုင်ပွဲကို မပြိုင်ပြိုင်အောင် အတင်းဆွဲခေါ်လို့ ပြိုင်ခဲ့ရတာလို့ ဆိုလိုက်တဲ့ ပက်ထရစ်ရှာ

နှစ်လိုဖွယ်ကောင်းပြီး လှပတဲ့မျက်နှာထားကို ပိုင်ဆိုင်ထားတဲ့ မော်ဒယ်လ်ပက်ထရစ်ရှာကို Miss World Myanmar အဖွဲ့အစည်းရဲ့ပြိုင်ပွဲကနေ ထုတ်ပယ်ခြင်းခံရတာနဲ့ ပတ်သက်ပြီး မေးဖြစ်ခဲ့တာတွေကတော့

အခုလိုMiss World Myanmar ပြိုင်ပွဲ ဆက်လက်မပြိုင်ရတော့ဘူးဆိုတာနဲ့ ပတ်သက်ပြီး ပြောပြပေးပါဦး။

ညီမကတော့ ဘာမှမသိဘူး။ ဒီလိုဖြစ်လာမယ်လို့လည်း မထင်ဘူး။ ညီမက အလုပ်တစ်ခု လုပ်မယ်ဆိုရင် ကိုယ်ကပြိုင်ပွဲတစ်ဘက်နဲ့ အလုပ်လုပ်နေတယ်။ ချက်ချင်းကြီး သူတို့ဘက်ကို အကြောင်းမကြားပဲ မလုပ်ပါဘူး။ ညီမက ဘယ်နေ့ရိုက်လို့အဆင်ပြေမလဲ၊ ညီမမှာရိုက်ဖို့ လက်ခံထားတဲ့ ကြော်ငြာတွေ ရှိတယ်။ သူတို့ပေးတဲ့ ရက်အတိုင်း ရိုက်ကူးခွင့်ပေးတယ်ဆိုလို့ပါ။ နှစ်ရက်နားတယ်လို့ ပြောတယ်လေ။ အဲဒီနှစ်ရက်ကို လက်ခံပြီးကြော်ငြာရိုက်ပါတယ်။ တကယ်တမ်း ရိုက်ကွင်းပေါ် ရောက်နေတဲ့အချိန်မှာ ညီမရဲ့အမေဆီကို ဖုန်းဆက်အကြောင်း ကြားလာပါတယ်။ ဘာလို့ဒီနေ့ မလာရတာလဲ။ ဒီနေ့ကTrainning day ပေါ့နော်။ ပြသနာတွေကို ကိုယ့်အပေါ်ပြန်ပြီး ပုံချတဲ့ ပုံစံမျိုးပြောတယ်။ စိတ်အနှောင့်အယှက် ဖြစ်ခဲ့ရပါတယ်။ အဲဒါနဲ့ပြိုင်ဖို့ ဘယ်လိုမှ အဆင်မပြေတော့ဘူးလို့ တွေးလိုက်မိပါတယ်။ သူတို့ပေးတဲ့ ရက်ကိုပဲ ညီမတို့ရိုက်ခဲ့တာပါ။ အဲဒါကို ညီမကို အပြစ်ပုံချပါတယ်။ ညီမက မပြိုင်ဖြစ်တော့ဘူးလို့ အကြောင်းကြားပါတယ်။ ညီမကို စည်းမျဉ်းစည်းကမ်း မလိုက်နာဘူး။ Trainning တွေ မဆင်းဘူးဆိုပြီး စွပ်စွဲပြောဆိုကြတယ်။ တကယ်တော့ ဒီလိုမျိုး သူတို့ဘက်က ပြောဆိုချက်တွေက ညီမရဲ့image ကို ထိခိုက်စေပါတယ်။ ညီမကို အားပေးနေတဲ့ ညီမရဲ့ပရိသတ်တွေ အတွက်လည်း မကောင်းဘူး။ တစ်မျိုး ထင်သွားနိုင်တာပေါ့နော်။ ညီမက စည်းကမ်းမရှိတဲ့သူ တစ်ယောက်ဖြစ်သွားတာပေါ့နော်။

ပက်ထရစ်ရှာက သူတို့ရဲ့Trainning ရက်တွေကို မပျက်ကွက်ဘူးလို့ပြောချင်တာလား။

ဟုတ်ပါတယ်။ ညီမတစ်ရက်မှ မပျက်ကွက်ခဲ့ဘူးပါဘူး။ နေမကောင်းနေတဲ့ အချိန်မှာတောင် votting အတွက် ဓာတ်ပုံရိုက်ရမှာလေ။ ကုတင်ပေါ်မှာ နားလိုက်ပြန်ရိုက်လိုက်နဲ့ ဗီဒီယိုရော၊ ဓာတ်ပုံရော နှစ်ခုလုံးကို သေချာရိုက်ပေးခဲ့ပါတယ်။ မိတ်ကပ်ပြင်လို့ မရတောင်မှ သူများတွေ ပြင်လို့လှနေချိန်မှာ ညီမမျက်နှာမှာဘယ်လိုမှ မိတ်ကပ်ပြင်လို့ မရခဲ့ပါဘူး။ အမှတ်လျော့မှာကြောက်လို့ ကြိုးကြိုးစားစားနဲ့ လုပ်ပေးခဲ့ပါတယ်။ အဲဒီ့ပုံကိုကြည့်ပြီးတော့တောင် ပက်ထရစ်ရှာ တစ်မျိုးကြီး ဖြစ်နေပါလား ဆိုပြီးတော့ ပရိသတ်တွေ ပြောကြသေးတယ်လေ။ ညီမဘက်က တစ်ရက်မှကို ပျက်ကွက်ခဲ့တယ် ဆိုတာမရှိပါဘူး။ သူတို့နားရက်လို့ ပြောလို့ ညီမနားရက်မှာပဲ ရိုက်ကူးရေး လက်ခံရိုက်ခဲ့တာပါ။ အဲဒါကို ညီမကို ပျက်ပါတယ်ဆိုပြီး ဝိုင်းပြောကြတယ်။ သူတို့ညီမအပြစ်တွေချည်းပဲ ပြောတယ်။ ပရိသတ်တွေထဲမှာလည်း အထင်မြင်စောင်းသွားတာတွေလည်း အများကြီးပဲ ရှိသွားတယ်။

ဒါဆို အခုထိMiss Myanmar World အဖွဲ့အစည်းနဲ့ ညှိုနှိုင်းနေတုန်းပဲလား။

ညီမနဲ့ ပတ်သက်ပြီး သူတို့ Status တွေ တင်ထားကျတယ်ပေါ့။ ပရိသတ်တွေ အခုဆို တော်တော် အထင်လွဲနေပြီလေ။ ဒီကိစ္စကိုဖြစ်ရပ်မှန် အမှန်ကို အမှန်အတိုင်းပဲ ရှင်းပြပေးစေချင်တာပါ။ ပြန်တင်ပေးပါလို့ ပြောထားပါတယ်။ အခုချိန်ထိ သူတို့ဘက်က ပြန်တင်မပေးသေးပါဘူး။ သူတို့ကပြောတယ်။ အမှန်ကို အမှန်အတိုင်း တင်ပေးရင် သူတို့ပွဲအတွက် ထိခိုက်နစ်နာပါတယ်။ ပရိသတ်တွေကဝိုင်းပြီးပြောဆိုကြမယ်ပေါ့။ ဒါပေမယ့် ညီမဘက်ကလည်း သူတို့ဘက်က ဒီလိုမှားယွင်းစွာ ပြောဆိုခဲ့တာကြောင့် ညီမသိက္ခာကျခဲ့ ရတယ်ဆိုတော့ အဲဒီ့ အတွက်ကြောင့် ပြန်ပြီး ရှင်းပြပေးစေချင်ပါတယ်။

ညီမလေးကိုMiss World အတွက် အားလုံးက အားပေးနေကြတာဆိုတော့ ဒီလိုမျိုးဖြစ်လာရတာက ရော ဘာကြောင့်လို့ ထင်ပါသလဲ။

ပရိသတ်တွေကတော့ ညီမကိုပြိုင်ပွဲတွေ အရမ်းပြိုင်စေချင်ကြတယ်လေ။ ညီမပြိုင်ပွဲဝင်ပြိုင်တော့ သူတို့ အရမ်းဝမ်းသာကျတယ်။ အကုန်လုံးကလည်း ပိုက်ဆံတွေ အကုန်ခံပြီးတော့ အချိ်န်တွေ အကုန်ခံပြီးတော့ vote ပေးကြတယ်။ အရမ်းကို ညီမကိုအားရှိခဲ့ရပါတယ်။ ပွဲတောင်လာကြည့်ဖို့ တာဆူထားကြတာရှိတယ်။ ဒီလိုမျိုးဖြစ်သွားတော့ သူတို့ ဘက်က မကျေမနပ်ဖြစ်ကြတာပေါ့။ သူတို့ဘက်က မကျေအေးတော့ဘူးဆိုတာ ရေးထားတာတွေ အများကြီးပဲတွေ့ရတယ်။ ပရိသတ် တော်တော်များများကလည်း သူတို့ရဲ့မျှော်လင့်ချက်ကို ရိုက်ချိုးပစ်တယ်ပေါ့နော်။

ပြီးတော့ညီမလေးအနေနဲ့ ပြိုင်ပွဲဝင်နေစဉ် ကာလမှာလည်းမပြိုင်တော့ပါဘူးဆိုပြီးလုပ်သေးတယ်လေ။ အဲဒါကရော ဘာကြောင့်လဲ။

အဲဒါက ဘယ်သူမှမသိတဲ့ အသေးအဖွဲလေးတွေကအစ စိတ်အနှောင့်အယှက် အရမ်းဖြစ်ခဲ့ရပါတယ်။ အဲဒီ့တုန်းက မပြိုင်တော့ဘူးဆိုတာက Miss World မယ်အယောက် နှစ်ဆယ်ဓာတ်ပုံကိုတင်တဲ့ ကိစ္စနဲ့ပါ။ ကျန်တဲ့သူတွေရဲ့ပုံ အကုန်လုံးလှပြီး ညီမရဲ့ပုံကို စကားပြောတာတောင်မှ ပုံဆိုးပန်းဆိုချည်း ဖြစ်နေတဲ့ ပုံကို တင်ထားတယ်လေ။ ဘာဖြစ်လို့ ဒီပုံကိုမှ ရွေးတင်ရတာလဲ။ ပုံတွေ အများကြီး ရိုက်ထားတာလေ။ ရုပ်ဆိုးတဲ့ပုံ ဘာလို့ထည့်တာလဲဆိုတော့ မျှမျှတတ ထည့်ပေါ့လို့ ပြောလိုက်တယ်။ အဲဒီ့ပုံကိုကြည့်ပြီး ပရိသတ်တွေက ရုပ်ဆိုးတော့ ဘယ်ပေးချင်ပါတော့မလဲ။ ဝေဖန်ကြတာပေါ့ ရုပ်ဆိုးလိုက်တာဆိုပြီး။ အဲဒီ့ ပရိသတ်တွေရဲ့စကားသံနဲ့ ဝေဖန်သံတွေကြားပြီး စိတ်ပျက်ခဲ့ရလို့ပါ။

ပက်ထရစ်ရှာကို Miss World Myanmar ပြိုင်ပွဲဝင်ပြိ်ုင်ဖို့ကို သူတို့ဘက်က ဝင်ပြိုင်ဖို့ စပြီး ကမ်းလှမ်းခဲ့တာလား၊ ဒါမှမဟုတ် ညီမဘက်ကပြိုင်ဖို့လုပ်ခဲ့တာလား ဆိုတာသိပါရစေ။

ညီမဘက်က ပရိသတ်တွေ အားပေးတယ်ဆိုပေမယ့် ပြိုင်ဖို့ကိုလည်း နည်းနည်းစဉ်းစားဖြစ်ခဲ့ပါတယ်။ ပထမဆုံးပြိုင်ပွဲလည်းဖြစ်တယ်။ ပွဲကလည်း ကြီးတယ်လေ။ ဘယ်လိုများဖြစ်မလဲဆိုပြီးတော့ အရမ်းရင်ခုန်ခဲ့ပါတယ်။ သူတို့ဘက်ကလည်း ပြိုင်ဖို့ အတင်းကို ဆွဲခေါ်ခဲ့တယ်။ မပြိုင်ပြိုင်အောင် အတင်းဆွဲခေါ်ကြတယ်။ အဲဒီလိုမျိုး ပရိသတ်တွေကို ပိုသိစေချင်တယ်။ ကျွန်မပြိုင်ချင်လွန်းလို့ ကျွန်မကို ခေါ်ပါလုပ်ခဲ့တာ မဟုတ်ပါဘူး။ ညီမနာမည်ကို အသုံးချပြီးတော့ လူတွေစိတ်ဝင်စားအောင် လုပ်ခဲ့တာလို့ပဲ မြင်ပါတယ်။