၂၀၁၃ ခုနှစ်နောက်ပိုင်း ဘင်္ဂလားဒေ့ရ်ှတွင် အထည်ချုပ်၂၀၀ ကျော် ပိတ်ခဲ့ရ

၂၀၁၃ ခုနှစ် ဧပြီလအတွင်းက ရာနာပလာဇာပြိုကျပြီး လူ ၁၁၃၈ ဦး သေဆုံးခဲ့သည့် နောက်ပိုင်း ဘင်္ဂလားဒေ့ရ်ှနိုင်ငံတွင် ပိတ်ပစ်ခဲ့ရသည့် အထည်ချုပ်စက်ရုံ ၂၀၀ ကျော်ရှိခဲ့ကြောင်း သိရသည်။အဆိုပါ ပြိုကျမှုဖြစ်စဉ်ကြောင့် ကမ္ဘာ့ဒုတိယအကြီးဆုံး အထည်ချုပ်လုပ်ငန်းရှိသည့် ဘင်္ဂလားဒေ့ရ်ှနိုင်ငံ တွင်စည်းကမ်းပိုင်း ဆိုင်ရာ ပြုပြင်ပြောင်းလည်းမှု အများအပြား လုပ်ဆောင်ခဲ့သည်။

အထည်ချုပ်စက်ရုံများ ပိတ်ပစ်ရမှုကြောင့် လူပေါင်းသောင်းနှင့်ချီ၍ အလုပ်လက်မဲ့ဖြစ်သွားခဲ့ပြီး နိုင်ငံ၏ ပို့ကုန်လုပ်ငန်းများ ကျဆင်းသွားသောကြောင့် အမေရိကန်ဒေါ် လာ ၂၄ ဒသမ ၅ ဘီလျံခန့် ရင်းနှီးမြှုပ်နှံ မှုရှိသည့် ဘင်္ဂလားဒေ့ရ်ှအထည်ချုပ်လုပ်ငန်းတွင် ထိခိုက်ဆုံးရှုံးမှုများ ဖြစ်ပေါ်ခဲ့သည်။

လူဦးရေ ၁၅၅ သန်းရှိသော ဘင်္ဂလားဒေ့ရ်ှနိုင်ငံ၏ အ၀တ်အထည်ထုတ်လုပ်တင်ပို့သူ လုပ်ငန်းရှင်များ အသင်း (BGMEA) တွင် အထည်ချုပ်စက်ရုံပေါင်း ၄၅၀၀ ခန့် ပါဝင်သည်။

BGMEA ၏ ဒုတိယဥက္ကဌ ရှာဟီဒူလာအာဇင်က “ကျွန်တော်တို့ ကောက်ယူထားတဲ့ စာရင်းတွေအရ ရာနာပလာဇာပြိုကျပြီးနောက်ပိုင်း အထည်ချုပ်စက်ရုံ ၂၁၈ ရုံပိတ်ပစ်ခဲ့ရပါတယ်။ အများစုဟာ အသေးစားနဲ့ အလတ်စား လုပ်ငန်းတွေဖြစ်ပြီး တစ်ရုံကို ၀န်ထမ်း ၃၀၀ ကနေ ၈၀၀ အထိ ရှိပါ တယ်။ ပိတ်ပစ်ခဲ့တဲ့ စက်ရုံတွေ ထဲက ၂၁ ရုံဟာ အနောက်နိုင်ငံက လက်လီအရောင်းအုပ်စုကြီးနှစ်ခုက တောင်းဆိုလာလို့ ပိတ်ခဲ့တာဖြစ်ပြီး ကျန်တဲ့ စက်ရုံတွေကတော့ သူတို့ဘာသာသူတို့ ပိတ်ပစ်ခဲ့ရတာ ပါ” ဟု ပြောကြားသည်။

Ref:AFP

Mizzima