မြန်မာနိုင်ငံ မုဒုံမြို့ ဝင်းစိန် တောရကျောင်းရှိ ကမ္ဘာ့ အကြီးဆုံး လျောင်းတော်မူ ဘုရားကြီးကို ထိုင်းတော်ဝင် မိသားစု ရှယ်ယာပိုင် ကုမ္ပဏီမှ ပြုပြင်ခြင်းနှင့် ထိန်းသိမ်း မွမ်းမံခြင်း လုပ်ငန်းများ လုပ်ဆောင် ပေးမည် ဖြစ်ကြောင်း ထိုင်းတော်ဝင် မိသားစု ရှယ်ယာပိုင် ကုမ္ပဏီ ဖြစ်သော SCG ကုမ္ပဏီမှ တာဝန်ရှိသူ တစ်ဦး၏ ပြောကြားချက် အရ သိရသည်။
ထိုကဲ့သို့ ဆောင်ရွက် ပေးခြင်းမှာ ကမ္ဘာ့ အကြီးဆုံး လျောင်းတော်မူ ဘုရားကြီး ရှိရာ ဒေသကို အထင်ကရ ဒေသတစ်ခု ဖြစ်လာ စေရေးနှင့် ကမ္ဘာလှည့် ခရီးသွားများ လာရောက်မှု တိုးတက်ရေး အတွက် ရည်ရွယ်၍ အောက်တိုဘာလ မှစတင်ကာ အဆင့် မြှင့်တင်ခြင်းများ ပြုလုပ်မည် ဖြစ်ကြောင်း သိရသည်။
ယင်းအတွက် ကုန်ကျငွေ အဖြစ် ဘတ်ငွေနှစ်သန်း ( အမေရိကန် ဒေါ်လာ ခြောက်သောင်း နှစ်ထောင့်ခြောက်ရာ) ငွေသားဝတ္ထု နှင့် အဆောက်အအုံ တည်ဆောက်ရန် လိုအပ်သည့် ဘိလပ်မြေ နှင့် ကြွေပြားများ အထောက်အပံ့ ပေးမည် ဖြစ်ကြောင်း သိရသည်။
တည်ဆောက် မွမ်းမံခြင်းများ လုပ်ဆောင်ရာတွင် တစ်နှစ်ခန့် ကြာမြင့်မည် ဖြစ်ပြီး ပြုပြင် မွမ်းမံခြင်းနှင့် ထိန်းသိမ်းခြင်း အစီအစဉ်များ တွင် လျောင်းတော်မူ ဘုရားကြီး ၏ အပြင်ပိုင်း နေရာ အစိတ်အပိုင်း များကို ပြုပြင်မွမ်းမံ ထိန်းသိမ်းခြင်း၊ အတွင်းပိုင်း ၌ ပန်းပုရုပ်များ ထုဆစ်ခြင်း၊ ဝင်ပေါက် ပတ်ဝန်းကျင်ကို ပိုမို တင့်တယ်စေရန် ပြုပြင်ခြင်း နှင့် အလည်အပတ် လာရောက် ဖူးမြော်သူ များအား သိသာ မြင်သာမှု ရှိစေရန် လမ်းညွှန်ပြ အမှတ်အသားများ ထားရှိခြင်းတို့ ပါဝင်ကြောင်း သိရသည်။
ထို့အပြင် ၄င်းဒေသ အနီးတစ်ဝိုက်ရှိ ကျေးရွာများမှ ပန်းရန် ပညာရှင်များ ကလည်း ပန်းပုရုပ်တု အသစ်များ ထုလုပ်ရာတွင် ပါဝင် ကူညီ သွားမည် ဖြစ်သည်။ လျောင်းတော်မူ ဘုရားကြီးကို ၁၉၉၃ ခုနှစ် မတ်လက လုပ်ငန်း စတင်ခဲ့ပြီး ၂ဝ၁၁ ခုနှစ်က ပြီးစီးခဲ့ကာ အလျားအားဖြင့် ပေ ၉ဝဝ ရှိကြောင်း၊ လျောင်းတော်မူ ဘုရားကြီး ၏ အတွင်းပိုင်း၌ အခန်းပေါင်း များစွာ ပါဝင်ပြီး အချို့ ပန်းချီလက်ရာ များနှင့် ပန်းပုလက်ရာ များမှာ ဗုဒ္ဓဝင် အကြောင်းအရာ များကို ခြယ်မှုန်း ထားခြင်း ဖြစ်ကြောင်း သိရသည်။
ကမ္ဘာ့ အကြီးဆုံး လျောင်းတော်မူ ဘုရားကြီး သည် မြေဧကပေါင်း ၄၉၉ ဒသမ ၆၂ ဧက ရှိသော သာသနာ့ နယ်မြေ၌ တည်ရှိပြီး အနီးတစ်ဝိုက် ၌ စေတီပေါင်း ၆ဝဝ၊ သာသနိက အဆောက်အအုံ ပေါင်း ၃ဝ၊ ရဟန္တာ ရုပ်တု ပေါင်း ၅ဝဝ နှင့် အမြင့်ပေ ၇ဝ ရှိ ရှင်ဥပဂုတ္တ ရုပ်ပွားတော် မြတ်ကြီး အားလည်း တွေ့မြင် နိုင်မည် ဖြစ်သည်။
ထိုင်း တော်ဝင် မိသားစု ရှယ်ယာပိုင် SCG ဘိလပ်မြေ လုပ်ငန်းစု အနေဖြင့် လူမှုစီးပွား ဖွံ့ဖြိုးမှု အစီအစဉ် များကို ဖော်ဆောင် ရာတွင် မြန်မာနိုင်ငံ၌ ၄င်းတို့ ရင်းနှီးမြှုပ်နှံ နေသော ဘိလပ်မြေ စီမံကိန်း ဒေသအနီးရှိ ကမ္ဘာ့ အကြီးဆုံး လျောင်းတော်မူ ဘုရားကြီး အား အဓွန့်ရှည် တည်မြဲ နိုင်စေရန် ပြင်ဆင် မွမ်းမံမှု အစီအစဉ်တွင် ပါဝင်လာခြင်း ဖြစ်ကြောင်း သိရသည်။
စိုးမိုး
Themyawadydaily
Yangon
0 comments:
Post a Comment