အိုးအိမ်မှ ဂရန်ချထားပေးသည့်မြေ၌ ကန်ထရိုက်တိုက် ဆောက်လုပ်ခြင်းကို ရပ်ကွက်နေပြည်သူများက ကန့်ကွက်ဆန္ဒပြစဉ် (ဓာတ်ပုံ-ရန်မျိုးအောင်)
အိုးအိမ်မှ ဂရန်ချထားပေးသည့်မြေ၌ ကန်ထရိုက်တိုက်ဆောက်လုပ်ခြင်းကို ရပ်ကွက်နေပြည်သူများက ကန့်ကွက်ပြီး ရပ်ကွက်ပိုင်မြေအဖြစ် သတ်မှတ်ပေးရန် ဆန္ဒထုတ်ဖော်မှုကို စက်တင်ဘာ ၂၈ ရက်၊ မွန်းလွဲ ၄ နာရီတွင် ရန်ကုန်မြို့ စမ်းချောင်းမြို့နယ်ရှိ ဝေဋ္ဌုဝန်မြောက်ပိုင်းရပ်ကွက်၌ ပြုလုပ်ခဲ့သည်။
ရပ်ကွက်နေပြည်သူအင်အား ၂၀ ခန့်က ဆောက်လုပ်ဆဲ ကန်ထရိုက်တိုက်ရှေ့တွင် “ရပ်ကွက်နေ အများပြည်သူပိုင် ဖွံ့ဖြိုးရေးစိုက်ပျိုးမြေကွက်အား အလွဲသုံးစားပြု၊ မတရားပြုသူတို့အား အရေးယူပေးရန်”၊ “စမ်းချောင်းမြို့နယ်ရှိ ပြည်သူကို ဥပေက္ခာပြု၍ ခရိုနီကိုကိုယ်စားပြုသော တာဝန်ရှိပုဂ္ဂိုလ်များအား ဖယ်ရှားပေးရေး”၊ ပြည်သူပိုင်မြေကွက်အား အထူးဂရန်နှင့် ဆောက်လုပ်ခွင့်ပေးခြင်းအပေါ် တာဝန်ရှိဌာနဆိုင်ရာ ပုဂ္ဂိုလ်များမှ စုံစမ်းစစ်ဆေး ဖော်ထုတ်ပေးပါရန်”၊ “၂၀၀၈ ဖွဲ့စည်းပုံအခြေခံဥပဒေအရ ၃၉၀ အခန်း(၈) နိုင်ငံသူနိုင်ငံသားများ၏ မူလအခွင့်အရေးနှင့် ပြည်သူပိုင်ပစ္စည်း ကာကွယ်ထိန်းသိမ်း စောင့်ရှောက်ခြင်းကို ဝေဋ္ဌုဝန် (မြောက်) ပြည်သူများ လိုက်နာကြပါသည်”၊ “ကျူးကျော်အဆောက်အအုံဖြစ်စဉ်တွင် အဘက်ဘက်မှ ပါဝင်ပတ်သက်သူများကို လာဘ်ပေးလာဘ်ယူ ပပျောက်ရေးကော်မတီမှ စစ်ဆေးအရေးယူပေးပါရန်” စသည့်ဗီနိုင်းစာသားများကိုင်ဆောင်ကာ ဆန္ဒထုတ်ဖော်ခဲ့ကြသည်။
“၂၀၁၁ ခုနစ် ကြားဖြတ်ရွေးကောက်ပွဲကာလမှာ အိုးအိမ်လူနဲ့ပေါင်း၊ ဂရန်ဖော်ထုတ်ပြီး ဒီအဆောက်အအုံကို ဆောက်တယ်။ ဒါကို ပြည်သူတွေက ကန့်ကွက်ပြီး တိုင်စာပို့တယ်။ အများပြည်သူပိုင်မြေအဖြစ် အစိုးရကိုတိုင်ထားတာ ရှစ်ကြိမ်လောက်ရှိပါပြီ။ ဌာနဆိုင်ရာကလူတွေနဲ့ ခရိုနီတွေပူးပေါင်းပြီး လုပ်စားတယ်လို့ပဲ မြင်ပါတယ်” ဟု ဆန္ဒထုတ်ဖော်ရာတွင်ပါဝင်သည့် ယင်းရပ်ကွက်တွင် အစဉ်အဆက် နေထိုင်လာသူ ဦးလှဝင်းကဆိုသည်။
၎င်းမြေသည် ယခင်က မြေကွက်လွတ်အဖြစ်တည်ရှိပြီး ရပ်ကွက်စိုက်ပျိုးရေးပြုလုပ်သော နေရာအဖြစ် အသုံးပြုခဲ့ကြောင်း ရပ်ကွက်နေပြည်သူများမှ ဆောက်လုပ်ရေးဝန်ကြီးဌာနသို့ တင်ပြထားသည့်စာတွင် ဖော်ပြထားသည်။
“အထောက်အထား အပြည့်အစုံနဲ့ ခိုင်ခိုင်မာမာလုပ်နေတော့ ဘာမှပြောဖို့ အခွင့်အလမ်းက သိပ်မရှိဘူး။ ပြည်သူတွေကတော့ ရပ်ကွက်ဖွံ့ဖြိုးရေးပိုင်မြေဆိုပြီး ဆန္ဒဖော်ထုတ်ကြတာပါ” ဟု ယင်းရပ်ကွက်အုပ်ချုပ်ရေးမှူး ဦးခင်မောင်သိန်းက ပြောကြားသည်။
“ကျွန်တော်တို့က တရားဥပဒေနဲ့အညီ ဂရန်လျှောက်ပြီး ရရှိထားတာပါ။ ရပ်ကွက်ကလူတွေလည်း လျှောက်ကြတယ်။ မရလို့ ဒီလိုကန့်ကွက် ဆန္ဒပြတယ် ထင်ပါတယ်” ဟု မြေပိုင်ရှင်၏သားဖြစ်သူ ကိုမျိုးမြင့်အောင်က ပြောကြားသည်။
Eleven
Yangon
0 comments:
Post a Comment