ကချင်ပြည်နယ်၊ မိုးညှင်းမြို့နယ်၊ အင်းတော်ကြီးဒေသ၊ ဟဲပါးကျေးရွာနေ ရှမ်းနီပါတီဝင် ရှမ်းနီစာပေ ဆရာမတစ်ဦးအား စက်တင်ဘာ (၁၅) ရက်နေ့တွင် ကချင်လွတ်မြောက်ရေးတပ်မတော် (KIA) အဖွဲ့မှ အရာရှိက ခြိမ်းခြောက်ပြောဆိုမှုများ ပြုလုပ်ခဲ့ကြောင်း ယင်းဒေသခံများထံမှ သတင်းရရှိသည်။
အဆိုပါ ပါတီဝင် ရှမ်းနီစာပေ ဆရာမ ဒေါ်ဝိုင်းသည် မိုးညှင်းမြို့နယ်၊ လုံးဆန့်ကျေးရွာနှင့် ချောင်းဝကျေးရွာများ၌ နေထိုင်သော ရှမ်းနီလူမျိုးများအား ရှမ်းနီလူမျိုးဖြစ်ကြောင်း ကဒ်ပြားများပြုလုပ်ပေးရန် လူအင်အားစာရင်းလိုက်လံ ကောက်ခံစဉ် KIA အဖွဲ့မှ ဗိုလ်အဆင့်ရှိ ဆန်နီဝင်သိန်းက လာရောက်ခြိမ်းခြောက် ပြောဆိုမှုများ ပြုလုပ်ခဲ့ခြင်းဖြစ်ကြောင်း သိရသည်။
“ ဆရာမက ရွာသူရွာသားတွေကို ရှမ်းနီလူမျိုးဖြစ်ကြောင်း အထောက်အထားပြနိုင်ဖို့ ကဒ်လုပ်ပေးမယ်ဆိုပြီး စာရင်းလာ ကောက်တာပါ၊ အဲဒါကို KIA အရာရှိက လာပြီးခြောက်တာပါ၊ သူမိန်းမလည်း ပါတယ်” ဟု လုံးဆန့် ရွာသားတစ်ဦက ပြောသည်။
KIA အရာရှိမှ ရှမ်းနီစာပေဆရာမအား ကချင်နိုင်ငံတွင် နေထိုင်သူသည် ကချင်လက်အောက်ခံဖြစ်ကြောင်း၊ ရှမ်းလူမျိုးဟု စာရင်းမသွင်းကြရန်နှင့် နောက်နောင်ကျေးရွာများအတွင်း စာရင်းကောက်ခံခြင်း၊ စည်းရုံးခြင်းများပြုလုပ် ပါက ဖမ်းဆီးချုပ်နှောင်၍ KIA ဗဟိုဌာနချုပ်သို့ ပို့ဆောင်အပြစ်ပေးအရေးယူမည်ဟု ခြိမ်းခြောက်ပြောဆိုခဲ့ကြောင်း သိရ သည်။
“ရှမ်းနီပါတီဝင်လည်းဖြစ်၊ ရှမ်းစာပေ ဆရာမတစ်ဦးလည်းဖြစ်တဲ့ ဒေါ်ဝိုင်းကို KIA အရာရှိကလာပြီး ခြိမ်းခြောက်တာကို ကျွန်တော်တို့ ပါတီအနေနဲ့ လက်မခံနိုင်ပါဘူး၊ ဒါဟာတိုင်းရင်းသားစည်းလုံးညီညွတ်ရေးကို ပြိုကွဲစေတဲ့ အသုံးအနှုန်း အပြု အမှုတွေဖြစ်ပါတယ်”ဟု ရှမ်းနီပါတီဝင်တစ်ဦးကပြောသည်။
ယင်းဖြစ်စဉ်နှင့်ပတ်သတ်၍ ဟိုပင်မြို့နယ်ခွဲ တိုင်းလိုင်(ရှမ်းနီ) ပါတီဥက္ကဋ္ဌ ဦးထိန်လင်းမှ ကျေနပ်မှုမရှိသဖြင့် ရှမ်းလူမျိုးများအား KIA အဖွဲ့က လက်နက်ကိုင်အားကိုးဖြင့် ခြိမ်းခြောက်နေကြောင်း နိုင်ငံတော်အစိုရသိရှိစေရန် တင်ပြ သွားမည်ဖြစ်ကြောင်း သိရှိရပါသည်။
စိုင်းထွန်းရင်
Shan News
Yangon
0 comments:
Post a Comment