လူတစ်ဦး သိန်း(၂၀)နှုန်းဖြင့် KIA အဖွဲ့ ပြန်ပေးဆွဲ

ကချင်ပြည်နယ်၊ မြစ်ကြီးနားမြို့၊ ကချင်စုရပ်ကွက်ရှိ လဖစက်လှေဆိပ်တွင် သွားလာနေသော ဒေသခံပြည်သူ များအား သြဂုတ်လ ဒုတိယပတ်မှစ၍ ကချင်လွတ်လပ်ရေးတပ်မတော်(KIA)အဖွဲ့မှ ပြန်ပေးဆွဲမှုများ ပြုလုပ် နေကြောင်း ယင်းဒေသခံများထံမှ သိရသည်။

အဆိုပါ စက်လှေဆိပ်ကမ်းမှ ဆွမ်ပရာဘွမ်မြို့နယ် လယန်ရွှေမှော်သို့ ပြေးဆွဲလျက်ရှိသော စက်လှေများတွင် လိုက်ပါလာသော ခရီးသည်များနှင့် ယာဉ်မောင်းများအား မှတ်ပုံတင်နှင့် မူးယစ်ဆေးဝါးရှာဖွေစစ်ဆေးခြင်းများ ပြုလုပ်ကာ ငွေတောင်းပြန်ပေးဆွဲနေခြင်းဖြစ်ကြောင်း ဒေသခံတစ်ဦးက ပြောသည်။

“ စက်လှေပေါ်မှာပါတဲ့ ခရီးသည်တွေနဲ့ စက်လှေမောင်းသမားတွေကို KIA အဖွဲ့က မှတ်ပုံတင်စစ်တယ်၊ မူးယစ်ဆေး သုံး၊ မသုံး စစ်တယ်လို့ အကြောင်းပြပြီး ငွေတောင်းတယ်၊ ငွေမပေးနိုင်ရင် ဖမ်းသွားတော့တာ ” ဟု ကိုယ်တွေ့ကြုံခဲ့သော မြို့ခံတစ်ဦးက ဆိုသည်။

KIA အဖွဲ့မှ မူးယစ်ဆေးဝါးသုံးစွဲသည်ဟု အကြောင်းပြစွပ်စွဲခံရသော ဒေသခံခရီးသွားပြည်သူများအနေဖြင့် တစ်ဦးလျှင် သိန်း(၂၀) ဒဏ်ကြေးငွေအဖြစ် ပေးဆောင်ရေကြောင်း၊ မပေးနိုင်ပါက ဖမ်းဆီးခေါ်ဆောင်သွားပြီး ငွေဖြင့် ပြန်ရွေးခိုင်းကြောင်း သိရသည်။

“ မူးယစ်ဆေး သုံးတာ မသုံးတာ သူတို့အဖွဲ့နဲ့ ဘာမှ မဆိုင်ဘူး၊ သက်သက်မဲ့ အကြောင်းရှာတာ၊ သူတို့ KIA စစ်သားမှန်သမျှ အကုန်လုံး ဘိန်းစားဆေးသမားတွေချည်းပဲ၊ တစ်ယောက် သိန်း(၂၀)တောင်းတယ်၊ ခရီးသွား နေတာဆိုတော့ ဘယ်ပေးနိုင်မလဲ၊ အဲဒါ ဖမ်းသွားတယ်လေ၊ ပြီးတော့မှ မိသားစုဆီ ဆက်သွယ်ပြီး ငွေနဲ့ လာရွေးခိုင်းတာ၊ ဒါဟာ ပြန်ပေးဆွဲတာပဲပေါ့ ” ဟု ကချင်စုရပ်ကွက်နေ စီးပွားရေးလုပ်ငန်းရှင်တစ်ဦးက ပြောသည်။

မူးယစ်ဆေး သုံးစွဲသည်ဟု စွပ်စွဲကာ KIA အဖွဲ့မှ ဖမ်းဆီးသွားသော ဒေသခံအမျိုးသား(၂၀)ဦးခန့်ရှိကြောင်းနှင့် ငွေသိန်း(၂၀)ဖြင့် ပြန်မရွေးပါက လူသစ်လုပ်ရမည်ဖြစ်ကြောင်း သိရသည်။

KIA အဖွဲ့မှ ငွေမပေးနိုင်၍ ဖမ်းဆီးထားသော အမျိုးသား(၂၀)ဦးအား လူသစ်အဖြစ် အိုရှီဇွတ်စခန်းသို့ ခေါ်ဆောင်သွားကြောင်း၊ ၎င်းစခန်းမှတစ်ဆင့် KIA သင်တန်းကျောင်းရှိရာ အင်ဂွန်းလသို့ ဆက်လက် ခေါ်ဆောင်သွားကြောင်း မျက်မြင်ဒေသခံများ၏ ပြောပြချက်အရ သိရှိရပါသည်။

ထိုက်ဇော်