မြန်မာဘက်မှ ကလေးခိုးလာသူ ထိုင်းတွင်ဖမ်းမိ

ဓာတ်ပုံ - ထိုင်းရတ်

20 January 2016

ထိုင်းနိုင်ငံ တာ့ခ်ခရိုင် မဲဆောက်မြို့နယ် တဘက်ကမ်းကို မြ၀တီဘက်ကနေပြီး ကလေးခိုးယူလာတဲ့ မြန်မာအမျိုးသမီးတဦးကို ထိုင်းရဲတပ်ဖွဲ့က ဖမ်းဆီးရမိခဲ့တယ်လို့ ထိုင်းရတ်သတင်းမှာ ဖော်ပြပါတယ်။

အသက် ၃ နှစ်အရွယ် ယောက်ျားလေးတဦးကို အမျိုးသမီးတဦးက ခိုးယူသွားကြောင်း တိုင်ကြားထားချက်ရထားလို့ မဲဆောက်မြို့နယ် ထိုင်းအာဏာပိုင်တွေက မြ၀တီတံတားနဲ့ သောင်ရင်းမြစ်ကမ်း အနီးတ၀ိုက်ကို သတိထား စောင့်ကြည့်နေစဉ် ခါးပိုက်နှိုက် အမျိုးသမီးတဦးဆီကနေ ပျောက်ဆုံးနေတဲ့ ကလေးငယ်ကို ပြန်ရခဲ့တာလို့ ထိုင်းရဲတပ်ဖွဲ့က ပြောပါတယ်။

ကလေးခိုးသူ အမျိုးသမီးဟာ အသက် ၃၃ နှစ်အရွယ်ရှိ မကေသွယ်မူ ဆိုသူဖြစ်ပြီး သူဟာ ကလေးကို မြ၀တီဘက်ခြမ်း ဈေးထဲက လူအုပ်တွေနဲ့ အတူရောပြီး ထိုင်းဘက်ကို ၀င်ရောက်လာကြောင်း၊ ထိုင်းဘက်ခြမ်းမှာ လူတယောက်ရဲ့ ပိုက်ဆံအိတ်ကို ခါးပိုက်နှိုက်ခဲ့ပြီး ခါးပိုက်နှိုက်ခံရသူက ရဲကို ချက်ချင်းတိုင်ကြားတဲ့အတွက် မရှေးမနှောင်းမှာပဲ သူ့ကို သက်သေခံပစ္စည်း ပိုက်ဆံအိတ်နဲ့အတူ ဖမ်းဆီးရမိတယ်လို့ ရဲတပ်ဖွဲ့က ပြောပါတယ်။

ရဲတပ်ဖွဲ့က မကေသွယ်မူကို ခါးပိုက်နှိုက်မှုနဲ့ စစ်ဆေးနေစဉ် သူ့ကလေးလို့ ပြောထားတဲ့ ကလေးငယ်က လိမ္မာပါးနပ်စွာနဲ့ အကူအညီ တောင်းခံတဲ့ အမူအယာတွေ ပြတာကြောင့် ရဲတပ်ဖွဲ့က ဘာသာပြန်ကတဆင့် ကလေးကို မေးမြန်းရာမှာ ကလေးငယ်က အမျိုးသမီးဟာ သူ့မိခင်မဟုတ်ဘဲ လူဆိုးဖြစ်ကြောင်း ပြောဆိုခဲ့တာလို့ ဆိုပါတယ်။

ကလေးငယ်မိခင်ဖြစ်သူ မစိုးဝင်းခိုင်ကလည်း သူမရဲ့ သားဖြစ်သူ မောင်ဆန်းဝင်းအောင်ဟာ လွန်ခဲ့တဲ့ ၃ ရက်က ပျောက်ဆုံးနေတာဖြစ်ကြောင်း၊ အဲဒီနေ့က သူဟာ ဆိုင်ထဲမှာ စက်ချုပ်နေပြီး ကလေးက ဆိုင်ရှေ့မှာ ကစားရင်းနဲ့ ပျောက်ဆုံးသွားလို့ ရဲကို တိုင်ကြားထားကြောင်း၊ အခုလို သားဖြစ်သူကို ပြန်ရှာပေးတဲ့အတွက် ထိုင်းအာဏာပိုင်တွေကို ကျေးဇူးအထူးတင်ကြောင်း ပြောကြားခဲ့ပါတယ်။

By ဒီဗွီဘီ